Document

INSTITUT TARIXI

O’zbekiston badiiy san’ati o’zining boy tarixi va asriy an’analariga ega. XX asrga kelib mamlakatimizda professional tasviriy san’atning barcha turlari va janrlari shakllandi. Muhimi, ushbu davrga kelib, mamlakatimiz rangtasviri jahondagi eng ilg’or mamlakatlar qatoridan o’rin egallab, uning ko’plab namoyandalari o’z asarlari bilan dunyodagi nozikta’b ixlosmandlar tiliga tushdi. Bugungi kunga kelib O’zbekiston rassomlari, haykaltaroshlarining katta va o’rta avlod vakillari nafaqat akademik realizmda, shuningdek zamonaviy san’at yo’nalishlarida, jumladan, realizm, dekorativizm, avangard, postmodernizm kabi turli yo’nalishlarda ijod qilib kelmoqdalar. Quvonarlisi shuki, ular qatoriga zamonaviy tasviriy san’at tizimining yanada rivojlanishiga katta hissa qo’shib kelayotgan ko’plab iste’dodli yosh rassomlar kelib qo’shilmoqda.

O’zbekiston Respublikasi Prezidentining 1997 yil 23 yanvardagi “O’zbekiston Badiiy Akademiyasini tashkil etish haqidagi Farmoni, Vazirlar Mahkamasining 1997 yil 11 martdagi 131-sonli Qaroriga asosan Mannon Uyg’ur nomidagi Toshkent davlat san’at institutining (hozirgi O’zbekiston san’at va madaniyat instituti) Rassomlik fakulteti negizida Kamoliddin Behzod nomidagi Milliy rassomlik va dizayn instituti tashkil topdi. Institutga Sharq miniatyura maktabiga asos solgan buyuk musavvir Kamoliddin Behzod nomi berildi.

O’tgan qisqa vaqt oralig’ida institutda qator yangi yo’nalishlar shakllandi, u o’z an’analariga ega bo’ldi. Dastlab “Rangtasvir”, “Amaliy san’at, “Grafika” ta’limi yo’nalishi bo’yicha ixtisos kadrlar tayyorlangan bo’lsa, keyinchalik, “San’atshunoslik”, 1997 yildan “Dizayn”, 2001 yildan “Menejment”, “Kasbiy ta’lim” yo’nalishlari bo’yicha bakalavriat bosqichida mutaxassis kadrlar tayyorlandi. 1999 yildan magistratura bosqichida mutaxassis kadrlar qabul qilinishi yo’lga qo’yilib, 2002 yildan oliy malakali ilmiy, ilmiy-pedagog kadrlar tayyorlash maqsadida Aspirantura bo’limi, 2010 yildan Katta ilmiy xodim-izlanuvchi va mustaqil izlanuvchilar instituti tashkil etildi.

Institutda 4 ta fakultet (Tasviriy san’at, Amaliy san’at, San’atshunoslik, Dizayn) faoliyat ko’rsatayotgan bo’lib, ularda 16 ta kafedra (Dastgohli rangtasvir, Mahobatli rangtasvir, Teatr bezagi rangtasviri, Dastgoh va kitob grafikasi, Badiiy kulolchilik va me’moriy yodgorliklar bezagini ta’mirlash, Haykaltaroshlik, Reklama va amaliy grafika, Chizmatasvir, Tasviriy san’at tarixi va nazariyasi, Muzeyshunoslik, Libos dizayni, Inter’erni loyihalash, Pedagogika va kasbiy ta’lim, Ijtimoiy fanlar, Tillar va adabiyot, Informatika va menejment) hamda Malaka oshirish va qayta tayyorlash bo’limi faoliyat ko’rsatmoqda.

Hozirda institut talabalarining umumiy kontingenti 1200 ga yaqin. Magistraturada 9 ta yo’nalish bo’yicha tahsil beriladi. Bugungi kunda oliygohda 200 dan ortiq professor-o’qituvchilar talabalarga tahsil berib kelmoqdalar. Ular orasida O’zbekiston Badiiy Akademiyasining akademiklari, O’zbekiston xalq rassomlari, O’zbekiston Respublikasi san’at arboblari, O’zbekiston Respublikasi Fan arbobi, fan doktorlari va nomzodlari, 20 nafarga yaqin professor, 40 nafarga yaqin dotsent faoliyat ko’rsatmoqda. Professor-o’qituvchilar orasida davlatimizning oliy mukofotlari bilan taqdirlanganlar ko’pchilikni tashkil etadi. Ta’lim muassasasida realistik maktab an’analarini rivojlantirish va o’ziga xoslikni saqlab qolish maqsadida professor-o’qituvchilar tomonidan “Ustoz-saboqlari” (“Master klasslar”) tashkil etiladi. So’nggi yillarda professor-o’qituvchilar tomonidan o’quv-uslubiy qo’llanmalar, darslik va qo’llanmalarning yangi avlodi, katalog, multimediyalar hamda boshqa axborot resurslari yaratilmoqda.

Bugungi kunda sohalari bo’yicha tayyorlanayotgan yuqori malakali mutaxassislar, grafika, rangtasvir, xaykaltarosh, kulol, ta’mirlash bo’yicha mutaxassislar, dizaynerlar, san’atshunoslar, muzeyshunoslar va kasbiy pedagoglar mamlakatimizdagi turli jabhalarda faoliyat ko’rsatmoqdalar. Oliygohda yuqori organ sifatida Ilmiy Kengash doimiy faoliyat ko’rsatadi hamda o’quv jarayonini, ta’lim va tarbiya masalalarini yanada takomillashtirish, kafedra va fakultetlarning ilmiy, ijodiy faoliyatini, huquqiy-normativ hujjatlar bilan ishlash jarayonini muvofiqlashtiradi. Ilmiy Kengash tarkibi rektor va prorektorlar, professorlar, O’zbekiston Badiiy Akademiyasi akademiklari, O’zbekiston xalq rassomlari, fakultet dekanlari, kafedra mudirlari, etakchi mutaxassislar va jamoat kengashi vakillaridan iborat. Institutda Ustoz-murabbiylar kengashi, Xotin-qizlar kengashi, “Kamolot” YoIH faoliyat olib bormoqda.

Institutda bugungi kunda Rossiya, Tojikiston, Qozog’iston, Turkmaniston kabi davlatlar fuqarolari tahsil ko’rmoqdalar. Institutda dunyoning qator davlatlari (Koreya, Xitoy, Germaniya, Ozarbayjon, Latviya, Qozog’iston) oliygohlari bilan imzolangan memorandumlar asosida hamkorlik aloqalari olib borilmoqda. Xususan, professor-o’qituvchilar va talabalar almashinuvi amalga oshirilmoqda. Shuningdek, institutning qator professor-o’qituvchilari dunyoning ko’plab mamlakatlari oliygohlarida mahorat darslari o’tib kelmoqdalar, malaka oshirmoqdalar, shaxsiy ko’rgazmalarini tashkil qilmoqdalar. Ko’plab mamlakatlarning yuqori malakali mutaxassislari institutda mahorat darslarini o’tishi an’anaga aylangan.

Institut talabalari turli xalqaro va respublika miqyosida o’tkazilayotgan festivallar, tanlov-ko’rgazmalar, fan olimpiadalarida muntazam yuqori o’rinlarni egallab kelmoqdalar. Ular orasida Zulfiya nomli davlat mukofoti sovrindorlari, Prezident va nomdor stipendiyalar sohiblari, “O’zbekiston belgisi” ko’krak nishoni egalari, turli tanlov va festivallar g’oliblari bor.