Bugun institutimiz hovlisida ko‘tarinki kayfiyat va o'zgacha bahoriy muhit hukm surdi. Navro'z umumxalq bayrami munosabati bilan institut xodimlari, professor-o'qituvchilar hamda xorijiy va mahalliy mehmonlar uchun "Navro'zni ulug'lash - insonni ulug'lash" shiori ostidagi bayram sayli tashkil etildi. Tadbirga O‘zbekiston Badiiy akademiyasi rahbariyati, Mahalliy hokimlik vakillari, xorijiy va mahalliy hamkor tashkilotlarning rahbarlari ham tashrif buyurib, institutimizda faoliyat yuritayotgan barcha xodimlar bilan birgalikda milliyligimiz va qadriyatlarimiz belgisi bo'lgan Navro'z saylida ishtirok etishdi.

Tadbirni institutimiz rektori Omonulla Salixov va O‘zbekiston Badiiy akademiyasi raisi Akmal Nuridinov birgalikda ochib berishdi hamda  mehmonlar va institut jamoasiga o'zlarining bayram tabrigi va samimiy tilaklarini bildirishdi.

Navro'z sayliga yig'ilgan mehmonlar va institut jamoasi bayram dasturxoniga taklif etilib, barchaga Navro'z umumxalq bayrami munosabati bilan tayyorlangan osh  tortiq etildi.  

Shuningdek, tadbir mehmonlari institutimiz iqtidorli talabalari va  taniqli san'atkorlar tomonidan tayyorlangan ma'naviy-ma'rifiy dasturlarni tomosha qilib, yanada yuqori bayram kayfiyatini his etishdi.

Xulosa o'rnida aytganda, bugungi bayram sayli nafaqat bahoriy yangilanish ayyomi, balki institutimizdagi ahillik, san’atga bo‘lgan yuksak ehtirom va milliy qadriyatlarimizning barhayotligini namoyish etgan unutilmas voqea bo‘ldi. Navro‘z — yangilanish, mehr-oqibat va hamjihatlik ramzi sifatida barchamizni bir ezgu maqsad yo‘lida birlashtirishda davom etadi.